La concession des moulins
8 juin 1513

... a mys, donné, laissé, accensé, octroyé et delibéré à Jehan Dardel demourant a Sainct Blaise présent et recevant pour luy et pour ses hoirs quelconques les deux mollins et le bapteur de Sainct Blaise, les maisons, mollins et bapteurs, leurs cheseaux et chesayement avec la place entre les deux mollins, ensemble le corps d'aigue d'icealx. Lesquelz maisons tant desditz mollins que bapteurs ledict Jehan pourra et debvra, sil veult, luy et sesdicts hoirs relargir, regrantir, maisonner à son voulloir et plaisir et y faire et édiffier quelque arnois et engin que bon luy semblera à luy ou les siens. Lesquelz mollins, bapteurs, maison d'iceulx, cheseaux et place, ensemble lesdictz fondz, tresfondz, corps d'aigue et toutes et singuliers leurs propres en héritage perpétuel. Lesquelz mollins et bapteurs, ledict Jehan et les siens que dessus auront les monnans moutères et toutes aultres et singulières droictures, appartenances. Lesquelz monnans et aultres acoustumées seront tenuz leurs et leurs héritiers mouldre et batre esdicts mollins et bapteurs comme ilz ont faict paradvant le temps passé sur peyne et danger qui peult estre ainsy qui est de bonne coustumes avec l'amende sellon les us et coustumes dudict lieu. Et ne debvra, ne pourra faire ne édiffier en toute la chastellanie aultres mollins et bapteurs quel lieu que ce soit en tout le ressort et le mandement d'icelle chastellanie du pont de Tielle. Lesquelz mollins ledict Jehan debvra et sera tenu, luy et les siens, tenir, maintenir et entretenir, gouverner et conduyre en bonne sorte, en façon et manière que le peuple y puisse faire son affaire et besoignie bien deuement comme est de bonne coustume. Et de toutes réparations, maintenance et édiffices et réédiffiecements, ledict Jehan en demeure chargé pour luy et ses hoirs. Et mesdictz Seigneurs et leurs successeurs quicte. Et pour la réparation, entretenements et réfaction des rouaiges desdicts arnoys, mollins et bapteurs, ledict Jehan Dardel, luy et les sesdicts hoirs, pourront faire et prendre du boys et marénaige ès boys de mesdictz Seigneurs moyennant quilz preignent congé et licence comme lon faict icy pouravant. Et auront mesdictz seigneurs et leurs successeurs leur grain et mouture à cause de leur chasteau du pont de Tielle...